سابق میونسپل چیئرمین عظیم بن یحییٰ کی 35 سالہ روایت، بغیر کسی عہدے کے امسال بھی 15 اگست کو ایم آئی ایم دفتر پر لہرائیں گے قومی پرچم

رپورٹ: آوازِ نرمل نیوز | 12 اگست 2026ء — نرمل: سابق میونسپل چیئرمین و سابق اے آئی ایم آئی ایم ٹاؤن صدر عظیم بن یحییٰ گزشتہ 35 برسوں کی اپنی روایت کو برقرار رکھتے ہوئے امسال بھی 15 اگست یومِ آزادی کے موقع پر اے آئی ایم آئی ایم پارٹی دفتر پر قومی پرچم لہرائیں گے۔ آوازِ نرمل نیوز کے پلیٹ فارم سے بات کرتے ہوئے اور اپنے جاری کردہ پریس نوٹ میں انہوں نے کہا کہ قومی جشن اور پرچم کشائی کسی سیاسی عہدے یا کرسی کی محتاج نہیں ہوتی۔ انہوں نے کہا کہ سیاسی عہدے تو آتے جاتے رہتے ہیں، مگر ہمارے علمائے کرام اور رہنماؤں کی عظیم قربانیوں اور جدوجہد سے حاصل شدہ آزادی کا احترام اور حب الوطنی کا جذبہ ہمیشہ قائم رہتا ہے۔ عظیم بن یحییٰ نے واضح کیا کہ جب تک ان کی سانسیں باقی ہیں، وہ اسی خلوص کے ساتھ ایم آئی ایم دفتر پر ترنگا لہراتے رہیں گے۔ اس پروقار موقع پر 15 اگست کی صبح ٹھیک 9:30 بجے ایم آئی ایم پارٹی دفتر واقع پریادرشنی نگر، نرمل میں پرچم کشائی کی تقریب منعقد ہوگی۔ انہوں نے نرمل شہر کے تمام معزز صحافی برادران اور تمام عام و خاص سے اس تقریب میں شرکت کی پرخلوص اپیل کی ہے۔