​وارڈ نمبر 35 میں وارڈ سبھا کا انعقاد: برسات کے موسم میں وبائی امراض سے بچاؤ اور صفائی ستھرائی پر خصوصی توجہ کی اپیل

 رپورٹ: آوازِ نرمل نیوز، 11 جون 2026— وارڈ نمبر 35 کے نمائندہ کونسلر محمد ذاکر کی زیرِ صدارت گزشتہ روز صبح 11 بجے ایک اہم وارڈ سبھا کا انعقاد عمل میں آیا، جس میں وارڈ آفیسر لنگنا، آشا ورکر گنگامنی اور آنگن واڑی ٹیچر لتا کے علاوہ مقامی عوام نے بڑی تعداد میں شرکت کی۔ اس موقع پر نمائندہ کونسلر محمد ذاکر نے عوام کو مخاطب کرتے ہوئے کہا کہ برسات کے موسم میں کئی طرح کی بیماریاں اور مشکلات پیدا ہو جاتی ہیں، جن سے بچنے کے لیے احتیاطی تدابیر اختیار کرنا نہایت ضروری ہے۔ انہوں نے سخت ناراضگی کا اظہار کرتے ہوئے کہا کہ بعض لوگ اپنے گھروں کا کچرا اور گندگی سڑکوں یا دوسروں کے گھروں کے سامنے پھینک دیتے ہیں، جو کہ انتہائی غلط اور غیر ذمہ دارانہ عمل ہے؛ اس کے بجائے عوام کو چاہیے کہ وہ اپنا کچرا صرف بلدیہ کی کچرا گاڑیوں (منشی پول والی گاڑیوں) میں ہی ڈالیں تاکہ وارڈ کو صاف ستھرا رکھا جا سکے۔ اجلاس میں شریک آشا ورکر اور آنگن واڑی ٹیچر نے بھی کیلنڈر اور چارٹس کی مدد سے مچھروں کی افزائش، ڈینگو، ملیریا اور دیگر وبائی امراض سے بچنے کے طریقے بتائے اور اصرار کیا کہ بارش کے دنوں میں پانی کو جمع نہ ہونے دیں اور صحت و صفائی کا خاص خیال رکھیں۔ وارڈ آفیسر لنگنا نے بلدیہ کی جانب سے ہر ممکن تعاون کا یقین دلایا، اور عوام سے اپیل کی کہ وہ ایک ذمہ دار شہری کا ثبوت دیتے ہوئے ماحول کو پاکیزہ رکھنے میں مقامی انتظامیہ کا ہاتھ بٹائیں۔