7 اپریل 2026: (نمائندہ: فاضل ہاشمی، آوازِ نرمل نیوز) — ریاست تلنگانہ کے ضلع نرمل کے حلقہ اسمبلی خانہ پور کے سابق رکنِ اسمبلی اجمیرا گووند نائک، جو گزشتہ دنوں علالت کے باعث انتقال کر گئے تھے، ان کے انتقال پر تعزیت اور لواحقین کو دلاسہ دینے کے لیے اہم سیاسی شخصیات نے ان کی رہائش گاہ کا دورہ کیا۔ منگل کے روز سابق مرکزی وزیر ڈاکٹر ایس وینوگوپال چاری اور تلنگانہ پردیش کانگریس کمیٹی (TPCC) کے ریاستی جنرل سکریٹری ایمبڑی راجیشور نے آنجہانی لیڈر کے اہل خانہ سے ملاقات کی اور گہرے دکھ کا اظہار کیا۔ اس موقع پر انہوں نے اجمیرا گووند نائک کی بیوہ اور ان کے بھائی ہری نائک سے فرداً فرداً ملاقات کرتے ہوئے انہیں پرسہ دیا اور مرحوم کی عوامی خدمات کو خراجِ عقیدت پیش کیا۔ اس تعزیتی ملاقات کے دوران ضلع کانگریس ایس ٹی سیل کے صدر بنوت گووند نائک، بی سی سیل کے رہنما ڈاکٹر ایس وینی منوج یادو، سورنا پروجیکٹ کے سابق صدر اولتری نارائن ریڈی، دیورکوٹہ کے سابق ڈائریکٹر سنتوش کمار اور ستیش ورما سمیت دیگر مقامی قائدین و کارکنان بڑی تعداد میں موجود تھے، جنہوں نے سوگوار خاندان کے ساتھ ہمدردی کا اظہار کرتے ہوئے آنجہانی کی روح کے سکون کے لیے دعا کی۔
