ترقیاتی کاموں میں حلقہ بندیوں کا کوئی فرق نہیں، متحدہ عادل آباد کو صنعتی اور تعلیمی مرکز بنائیں گے: وزیر اعلیٰ اے ریونت ریڈی

 تاریخ: 06 اپریل 2026 | نمائندہ: فاضل ہاشمی، آوازِ نرمل نیوز: تلنگانہ کے وزیر اعلیٰ جناب اے ریونت ریڈی صاحب نے واشگاف انداز میں اعلان کیا ہے کہ ریاست کی ترقی کے معاملے میں کسی بھی حلقے کے ساتھ کوئی امتیازی سلوک نہیں کیا جائے گا اور حکومت سیاسی وابستگیوں سے بالاتر ہو کر ہر علاقے کی فلاح و بہبود کے لیے کوشاں ہے۔ ضلع عادل آباد کے منڈل بازار ہتھنور کے موضع پپری میں منعقدہ "پراجا پالنا - پرگتی پرانالیکا" پروگرام کے تحت نائب وزیر اعلیٰ بھٹی وکرمارک اور دیگر عوامی نمائندوں کے ہمراہ متعدد ترقیاتی کاموں کا سنگ بنیاد رکھنے کے بعد ایک بڑے عوامی جلسے سے خطاب کرتے ہوئے وزیر اعلیٰ نے کہا کہ بھلے ہی اس ضلع میں ان کی پارٹی کے ارکان اسمبلی یا پارلیمنٹ موجود نہیں ہیں، لیکن وہ متحدہ عادل آباد کی ترقی کو اولین ترجیح دے رہے ہیں۔ انہوں نے واضح کیا کہ اندیرمّہ مکانات کی فراہمی، مفت بجلی، قرض معافی اور خواتین کے لیے آر ٹی سی بسوں میں مفت سفر جیسی اسکیمات بغیر کسی سیاسی تفریق کے ہر مستحق تک پہنچائی جا رہی ہیں کیونکہ ان کی حکومت کا مقصد صرف غریبوں کی آنکھوں میں خوشی دیکھنا ہے۔ وزیر اعلیٰ نے مستقبل کا خاکہ پیش کرتے ہوئے کہا کہ سال 2034 تک عادل آباد کو ملک کے بڑے صنعتی علاقوں، سیاحتی مراکز اور تعلیمی حب کے طور پر تیار کیا جائے گا، جس کے لیے زیر التوا پرانہیتہ-چیویلہ پراجیکٹ کو مکمل کر کے پینے اور آبپاشی کے پانی کا مسئلہ حل کیا جائے گا۔ انہوں نے مزید کہا کہ 2 جون تک عادل آباد ایئرپورٹ کا سنگ بنیاد رکھنے کی کوشش کی جا رہی ہے اور  باصر سرسوتی مندر کی توسیع کے لیے 225 کروڑ روپے پہلے ہی منظور کیے جا چکے ہیں۔ تقریب کے اختتام پر وزیر اعلیٰ نے 30,149 سیلف ہیلپ گروپس کے لیے 53.50 کروڑ روپے کا چیک جاری کیا اور بہترین خدمات انجام دینے والے سرپنچوں کو آئی ایس او سرٹیفکیٹ سے نوازتے ہوئے اس عزم کو دہرایا کہ وہ ہر دو ماہ میں ضلع کا دورہ کر کے ترقیاتی فنڈز کی فراہمی کو یقینی بنائیں گے۔