رپورٹ: آوازِ نرمل نیوز | بتاریخ: 12 اپریل 2026 | نمائندہ: فاضل ہاشمی نظام آباد شہر کے چندر شیکھر کالونی چوراہے پر اتوار کے روز ایک باوقار تقریب میں عظیم سماجی انقلابی ڈاکٹر انا بھاؤ ساٹھے کے مجسمے کی نقاب کشائی انتہائی تزک و احتشام کے ساتھ عمل میں آئی، جس میں حکومتِ تلنگانہ کے مشیر محمد علی شبیر، ٹی پی سی سی صدر مہیش کمار گوڑ، ریاستی وزیر ایڈلوری لکشمن اور سیاسی رہنما پدمارتی روی نے بطور مہمانِ خصوصی شرکت کی۔ اس موقع پر ضلع کے مادگیہ برادری سے تعلق رکھنے والے نو منتخب سرپنچوں، وارڈ ممبران، کونسلروں اور کارپوریٹروں کی گلپوشی کرتے ہوئے انہیں شاندار طریقے سے سراہا گیا۔ محمد علی شبیر نے اپنے خطاب میں واضح کیا کہ ڈاکٹر انا بھاؤ ساٹھے محض ایک طبقے کے رہنما نہیں بلکہ تمام مظلوموں کی توانا آواز تھے اور حکومت تلنگانہ کی سرزمین پر سماجی انصاف کی فراہمی کے لیے پرعزم ہے، جبکہ ٹی پی سی سی صدر مہیش کمار گوڑ اور وزیر ایڈلوری لکشمن نے زور دیا کہ کانگریس پارٹی ہمیشہ سے کمزور طبقات کی حامی رہی ہے اور نو منتخب نمائندوں کو چاہیے کہ وہ اپنے اختیارات کو غریبوں کی فلاح و بہبود اور امبیڈکر و ساٹھے کے نظریات کی ترویج کے لیے وقف کر دیں تاکہ حقیقی سماجی و معاشی تبدیلی لائی جا سکے۔
