عادل آباد: انچارج وزیر جوپلی کرشنا راؤ کے ہاتھوں 'آخری سفر' میت گاڑی کا افتتاح

محکمہ اقلیتی بہبود کی جانب سے جدید سواری کی فراہمی، سابق صدر ڈی سی سی ساجد خان و دیگر معززین کی شرکت

عادل آباد: (خصوصی رپورٹ، آوازِ نرمل: ایڈیٹر ان چیف:- عثمان بن عقیل)

حکومتِ تلنگانہ کی جانب سے اقلیتوں کی فلاح و بہبود اور ان کی سماجی ضروریات کی تکمیل کے لیے ایک اور اہم قدم اٹھاتے ہوئے ضلع عادل آباد کے لیے مخصوص 'آخری سفر' (میت گاڑی) کا باقاعدہ افتتاح عمل میں آیا۔ اس پروقار تقریب میں ریاستی وزیر برائے ایکسائز، سیاحت و ثقافت و ضلع انچارج وزیر جناب جوپلی کرشنا راؤ نے بطور مہمانِ خصوصی شرکت کی اور اپنے دستِ مبارک سے گاڑی کی کلید (چابی) ذمہ داران کے حوالے کی۔ اس موقع پر ضلع کلکٹر عادل آباد، میونسپل چیئرمین، وائس چیئرمین اور مقامی کونسلرز کے علاوہ شہر کی اہم سیاسی و سماجی شخصیات کی بڑی تعداد موجود تھی۔

تقریب میں سابق صدر ڈی سی سی جناب ساجد خان نے بطورِ خاص شرکت کی۔ اگرچہ جناب ساجد خان اس وقت کسی سرکاری عہدے پر فائز نہیں ہیں، تاہم عوامی اور ملی کاموں میں ان کی دلچسپی اور مسلسل جدوجہد کو دیکھتے ہوئے ان کی موجودگی کو کافی اہمیت دی گئی۔ انہوں نے وزیر موصوف اور ضلع انتظامیہ کے ہمراہ گاڑی کا تفصیلی معائنہ کیا اور اس سہولت کو پسماندہ طبقات کے لیے ایک بڑی راحت قرار دیا۔ جناب ساجد خان نے جامع مسجد کمیٹی کے اراکین اور ذمہ داران کو مبارکباد پیش کرتے ہوئے کہا کہ وہ محض ایک خادمِ خلق کے طور پر عوام کے درمیان موجود ہیں اور ان کا مقصد سیاست سے بالاتر ہو کر انسانیت کی خدمت کرنا ہے۔

وزیر جوپلی کرشنا راؤ نے میڈیا سے گفتگو کرتے ہوئے کہا کہ محکمہ اقلیتی بہبود کے تحت فراہم کردہ یہ جدید گاڑی تدفین کے مراحل میں ضرورت مند خاندانوں کے لیے معاون ثابت ہوگی۔ انہوں نے مزید کہا کہ حکومتِ تلنگانہ ہر طبقے کی بنیادی ضروریات کا خیال رکھ رہی ہے اور عادل آباد کی ترقی ان کی ترجیحات میں شامل ہے۔ جامع مسجد کے ذمہ داران، کونسلرز اور معززینِ شہر نے اس مستحسن اقدام پر حکومت اور محکمہ اقلیتی بہبود کا 

شکریہ ادا کیا۔