نرمل: مجلسِ اتحاد المسلمین کی عظیم الشان دعوتِ افطار کل، ایم ایل اے محمد ماجد حسین کی آمد

 وقت کی پابندی ملحوظ رکھیں، امتِ مسلمین سے صدرِ مجلس محمد مجاہد علی کی پُرزور اپیل

خصوصی رپورٹ: عثمان بن عقیل (ایڈیٹر ان چیف، آوازِ نرمل)

  نرمل 6 مارچ مجلسِ اتحاد المسلمین شاخ نرمل کے زیرِ اہتمام کل 7 مارچ بروز ہفتہ، بمقام روبرو مسجدِ گلزار، ایک عظیم الشان 'دعوتِ افطار' کا اہتمام کیا جا رہا ہے۔ اس پروقار تقریب میں حیدرآباد کے حلقہ اسمبلی نامپلی سے تعلق رکھنے والے ممتاز مجلسی قائد اور رکنِ اسمبلی محمد ماجد حسین بطور مہمانِ خصوصی شرکت فرمائیں گے۔ شہرِ نرمل میں مجلسِ اتحاد المسلمین کی جانب سے اس یادگار تقریب کے لیے وسیع پیمانے پر انتظامات کو قطعیت دی جا چکی ہے، جس میں علمائے کرام، معززینِ شہر اور سیاسی و سماجی شخصیات کے علاوہ عوام کی کثیر تعداد متوقع ہے۔

​صدرِ مجلسِ نرمل محمد مجاہد علی نے میڈیا کے نمائندوں سے خصوصی گفتگو کرتے ہوئے کہا کہ رمضان المبارک کا مقدس مہینہ ہمیں ملی اتحاد، اخوت اور نظم و ضبط کا درس دیتا ہے۔ انہوں نے تمام امتِ مسلمین اور فرزندانِ اسلام سے پرُزور خواہش کی ہے کہ وہ وقت کی پابندی کا خاص خیال رکھتے ہوئے بروقت تقریب میں تشریف لائیں تاکہ افطار کے تقدس اور نظم و ضبط کو برقرار رکھا جا سکے۔ انہوں نے مزید کہا کہ ایم ایل اے محمد ماجد حسین کی آمد سے نرمل کے عوام میں مسرت کی لہر دوڑ گئی ہے اور یہ تقریب شہر میں اتحاد و بھائی چارے کی ایک نئی مثال قائم کرے گی۔