ای اسکوٹر اسکیم پورٹل کی ادھوری فہرست؛ ضلع نرمل کے اقلیتی نوجوانوں کی حق تلفی پر 'آوازِ نرمل نیوز' کی اہم نشاندہی

 

رپورٹ:
حکومتِ تلنگانہ کی جانب سے اقلیتی نوجوانوں کی معاشی ترقی اور انہیں خود روزگاری کے باعزت مواقع فراہم کرنے کے لیے 'ای اسکوٹر اسکیم' کا آغاز ایک نہایت خوش آئند اور دور اندیشانہ اقدام ہے، جس کی عوامی حلقوں میں بڑے پیمانے پر پزیرائی کی جا رہی ہے۔ تاہم، اس وقت ایک تکنیکی مسئلہ مستحق امیدواروں کے لیے پریشانی کا باعث بنا ہوا ہے کہ تلنگانہ مینوریٹی فنانس کارپوریشن کے آن لائن رجسٹریشن پورٹل پر دستیاب اضلاع کی فہرست میں ریاست کے تمام 33 اضلاع کے بجائے صرف 25 اضلاع کے نام ہی درج ہیں، جس کے نتیجے میں ضلع نرمل سمیت کئی اہم اضلاع کے نوجوان اس اہم ترین معاشی امداد کے لیے آن لائن فارم بھرنے سے قاصر ہیں۔ ایک ذمہ دار میڈیا نیٹ ورک ہونے کے ناطے 'آوازِ نرمل نیوز' اس اہم نکتے کی جانب حکامِ بالا کی توجہ مبذول کرواتا ہے کہ جب یہ اسکیم پوری ریاست کے لیے مختص ہے، تو پورٹل پر چند اضلاع کی عدم موجودگی ہزاروں باصلاحیت نوجوانوں کی حق تلفی کا سبب بن رہی ہے۔ عوامی حلقوں نے حکومت کی نیت اور اس فلاحی منصوبے کی اہمیت پر بھرپور اعتماد کا اظہار کرتے ہوئے امید ظاہر کی ہے کہ انتظامیہ اس تکنیکی خامی کا فوری نوٹس لے گی اور پورٹل کی تجدید (Update) کے ذریعے تمام 33 اضلاع کو اس میں شامل کرے گی تاکہ حکومت کے اس احسن اقدام کے ثمرات بلا تفریق ریاست کے ہر مستحق نوجوان تک پہنچ سکیں۔