حیدرآباد: سید نگر مجلس یونٹ کے زیرِ اہتمام عظیم الشان افطار پارٹی، رکنِ اسمبلی نامپلی محمد ماجد حسین کی شرکت

رپورٹ پیشکش: عثمان بن عقیل (آوازِ نرمل)حیدرآباد/نرمل (بیورو رپورٹ): نامپلی کے علاقے سید نگر میں مجلس اتحاد المسلمین (سید نگر یونٹ) کے زیرِ اہتمام ایک پُروقار اور عظیم الشان افطار پارٹی کا انعقاد عمل میں آیا، جس میں ہزاروں کی تعداد میں فرزندانِ توحید نے شرکت فرما کر مثالی اتحاد کا ثبوت دیا۔ اس پُرمسرت تقریب میں حلقہ اسمبلی نامپلی کے مقبول عوامی قائد و رکنِ اسمبلی محمد ماجد حسین نے بحیثیت مہمانِ خصوصی شرکت کی، جن کے ہمراہ مقامی صدر ایم آئی ایم فردوس بھی موجود تھے۔ اس افطار پارٹی میں ضلع نرمل سے تعلق رکھنے والے فعال نوجوانوں اور معززین کے ایک خصوصی وفد بشمول میونسپل نمائندہ کونسلر نرمل راحیل، شیخ سلمان، شیخ افسر الدین، رحیم حمزہ اورق محمد اکرم نے بھی بھرپور شرکت کی۔ تقریب کے اختتام پر، نرمل کے اس وفد نے رکنِ اسمبلی محمد ماجد حسین سے ایک خصوصی نشست میں تفصیلی ملاقات کی، جس کے دوران ضلع نرمل کے موجودہ سیاسی و سماجی حالاتِ حاضرہ اور عوامی مسائل پر تعمیری گفتگو کی گئی۔ محمد ماجد حسین نے وفد کی سیاسی بصیرت اور ملی جذبے کی ستائش کی۔ سید نگر مجلس یونٹ کے ذمہ داران کی جانب سے تمام شرکاء کا والہانہ استقبال کیا گیا، جبکہ نمازِ مغرب سے قبل ملک و ملت کی سلامتی اور امن و امان کے لیے خصوصی دعائیں مانگی گئیں۔