عوام کی پکار، کلکٹر کی دہلیز پر: ضلع نرمل میں پیر سے 'پراجا واانی' (عوامی دربار) کا پرجوش دوبارہ آغاز!

ہمارا نمائندہ: فاضل ہاشمی تحریر: عثمان بن عقیل

نرمل (پریس نوٹ): ضلع کلکٹر نرمل محترمہ ابھیلاشا ابھینو نے ایک صحافتی بیان جاری کرتے ہوئے اعلان کیا ہے کہ ضلع کلکٹریٹ میں عوامی شکایات کے ازالے کے لیے منعقد ہونے والا ہفتہ وار پروگرام 'پراجا واانی' (عوامی سماعت) رواں ماہ کی 23 تاریخ (پیر) سے اپنی اصل شکل میں بحال کر دیا جائے گا۔ کلکٹر میڈم نے وضاحت کی کہ میونسپل انتخابات کے پیشِ نظر نافذ العمل مثالی ضابطہ اخلاق (Model Code of Conduct) کی مدت کے اختتام کے بعد، انتظامیہ نے عوامی مسائل کو ترجیحی بنیادوں پر حل کرنے کے لیے اس سلسلے کو دوبارہ شروع کرنے کا فیصلہ کیا ہے۔ انہوں نے ضلع نرمل کے تمام شہریوں، خاص طور پر دور دراز علاقوں سے تعلق رکھنے والے ضرورت مند افراد سے اپیل کی ہے کہ وہ اپنے زیرِ التوا مسائل، شکایات یا مختلف فلاحی مطالبات کے حوالے سے اپنی تحریری درخواستیں ہر پیر کو کلکٹریٹ کے مخصوص ہال میں منعقد ہونے والے اس پروگرام میں براہِ راست اعلیٰ حکام کو پیش کریں اور حکومتِ تلنگانہ کی جانب سے فراہم کردہ اس عوامی پلیٹ فارم کا بھرپور فائدہ اٹھائیں۔