شہر کی سڑکوں کی مرمت، اسٹریٹ لائٹس کی بحالی اور ضلع میں یونیورسٹی کے قیام کا پرزور مطالبہ

 

نرمل، 21 ستمبر (آوازِ نرمل نیوز): ضلع نرمل میں اندرونی سڑکوں کی خستہ حالی، رات کے وقت اسٹریٹ لائٹس کی عدم موجودگی، ریونیو شعبے میں ذات، آمدنی و رہائشی سرٹیفکیٹس کے اجراء میں غیر ضروری تاخیر اور ضلع کے لیے ایک الگ یونیورسٹی کے قیام جیسے اہم عوامی و تعلیمی مسائل کو لے کر بی آر ایس اور BRSV کی قیادت نے ضلع کلکٹر سے ملاقات کرتے ہوئے ایک تفصیلی یادداشت پیش کی۔ اس موقع پر بی آر ایس کے سینئر رہنما شیخ امتیاز احمد، ایڈوکیٹ محمد اظہر اور BRSV کے ضلع نائب صدر مرزا شعیب بیگ نے نمائندگی کرتے ہوئے انتظامیہ کا دھیان شہر کے دگرگوں حالات کی طرف مبذول کروایا۔ رہنماؤں نے واضح کیا کہ شہر کے متعدد اندرونی اور غریب علاقوں میں سڑکیں مکمل طور پر تباہ حال ہو چکی ہیں اور اسٹریٹ لائٹس نہ ہونے کی وجہ سے آئے دن شہری حادثات کا شکار ہو رہے ہیں، جبکہ اندھیرے کا فائدہ اٹھا کر سانپ اور بچھو کے کاٹنے کے المناک واقعات بھی پیش آ رہے ہیں۔ مزید برآں، ریونیو دفاتر میں سرکاری اسکیموں سے استفادے کے لیے درکار ضروری سرٹیفکیٹس کے حصول میں عوام کو شدید مشکلات کا سامنا کرنا پڑ رہا ہے۔ دوسری جانب، طلبہ کے روشن مستقبل کے پیش نظر باسرہ IIIT کے پس منظر میں کیے گئے سرکاری اعلانات کی روشنی میں نرمل کے لیے فوری یونیورسٹی کی منظوری کا مطالبہ کیا گیا۔ رہنماؤں نے خبردار کیا کہ اگر انتظامیہ نے ان بنیادی مسائل کو جلد از جلد حل کرنے کے لیے عملی اقدامات نہ کیے، تو بی آر ایس اور BRSV عوامی مفاد میں ایک وسیع تر احتجاجی تحریک شروع کرنے پر مجبور ہوں گی۔