عملی تعلیم اور عوامی مسائل کے حل کے لیے ضلع کلکٹر بھویش مشرا کا دورۂ تانور

 تانور/نرمّل (آوازِ نرمّل نیوز بیورو): 1 ستمبر (پریس نوٹ): ضلع کلکٹر بھویش مشرا نے واضح کیا کہ محض کتابی معلومات کے بجائے عملی تعلیم کی فراہمی سے ہی طلبہ میں خود اعتمادی اور تخلیقی صلاحیتیں فروغ پاتی ہیں۔ انہوں نے منگل کے روز تانور منڈل ہیڈ کوارٹر میں واقع کستوربا گاندھی بالیکاؤں کے اسکول (KGBV) کا اچانک معائنہ کرتے ہوئے کلاس رومس، ہاسٹل اور عمارت کے اطراف و اکناف کی صفائی کا جائزہ لیا اور عملے کو ہدایت دی کہ ناپسندیدہ جھاڑیوں کو فوری ہٹا کر تعلیمی ماحول کو پاکیزہ رکھیں۔ کلکٹر نے اساتذہ اور طلبہ کی سو فیصد حاضری کو یقینی بنانے، وقتِ مقررہ پر نصاب مکمل کرنے اور دسویں جماعت کے سالانہ امتحانات کے لیے ابھی سے منصوبہ بند تیاری شروع کروانے پر زور دیا۔ دسویں جماعت کی طالبات سے گفتگو کے دوران انہوں نے تعلیمی معیار، ہاسٹل کی سہولیات اور غذا کی کیفیت کا جائزہ لیا، نیز بلیک بورڈ پر ریاضی کے سوالات حل کروا کر صحیح جواب دینے والی طالبات کی افزائشِ افزائی کی اور قلم تحفے میں دیے؛ ساتھ ہی طلبہ کو بغیر کسی خوف و تناؤ کے ڈسپلن کے ساتھ تعلیم حاصل کرنے کا مشورہ دیا۔ اس دورے سے قبل کلکٹر بھویش مشرا نے موگلی گاؤں کے وٹھلیشور مندر کے احاطے میں پی اے سی ایل (PACL) سے متاثرہ کسانوں کے مسائل سنے اور متعلقہ حکام، گرام پنچایت سکریٹریز اور جی پی اوز کو ہدایت دی کہ وہ متاثرہ کسانوں کی تفصیلات جمع کر کے جامع رپورٹ تیار کریں، تاکہ ضرورت پڑنے پر سروے انجام دے کر اور گرام سبھا کا انعقاد عمل میں لا کر زمین کے تنازعات کا مستقل حل نکالا جا سکے۔ اس موقع پر گاؤں کی سڑکوں کی مرمت کے سلسلے میں موصولہ نمائندگی پر بھی کلکٹر نے فوری کارروائی کا ایقان دلایا اور مندر میں خصوصی پوجا میں شرکت کی۔ اس پروگرام میں بھینسہ سب کلکٹر اجمیرا سنکیت کمار، ضلع ایجوکیشنل آفیسر بھوجنا، تحسیلدار مہیندر ناتھ، ایم پی ڈی او سریدھر، اے ایم سی چیئرمین شندے آنند راؤ پٹیل، سابق ایم ایل اے وٹھل ریڈی، سرپنچ اوشا، نائب سرپنچ نتن اور دیگر مقامی نمائندے و کسان موجود تھے۔