اقلیتی کانگریس کونسلرز کی ٹی پی سی سی صدر و انچارج منتری سے اہم ملاقات: پرامن گنیش اتسو اور 15 کروڑ کے ترقیاتی کاموں کا مطالبہ

 رپورٹ: آوازِ نرمل نیوز | 11 ستمبر 2026: آنے والے گنیش اتسو کے موقع پر شہرِ نرمل میں امن و امان کی برقراری، آپسی بھائی چارے کے فروغ اور تمام برادریوں و پولیس انتظامیہ کے مابین منصفانہ، محترم اور غیر جانبدارانہ رابطے کو یقینی بنانے کے لیے نرمل کے اقلیتی کانگریس کونسلرز اور نمائندہ کونسلرز نے ایک انتہائی اہم قدم اٹھاتے ہوئے حیدرآباد میں اعلیٰ قیادت سے ملاقات کی۔ ڈی سی سی صدر ویدم بھوجو پٹیل کی قیادت میں اس وفد نے ٹی پی سی سی صدر مہیش کمار گوڑ اور انچارج منتری جوپلی کرشنا راؤ سے بالمشافہ ملاقات کرتے ہوئے گنیش اتسو کی تیاریاں اور 7 ستمبر کو منعقدہ پیس میٹنگ کے تمام پہلوؤں و تحفظات کو سنجیدگی کے ساتھ پیش کیا۔ وفد نے اس بات پر زور دیا کہ تیوہاروں کو پرامن اور پروقار ماحول میں منانے کے لیے پولیس انتظامیہ کا تمام طبقات کے ساتھ یکساں و محترم رویہ اور باہمی اعتماد ہی شہر میں پائیدار امن کی سب سے بڑی ضمانت ہے۔ اس کے ساتھ ہی وفد نے شہرِ نرمل کی ہمہ جہت ترقی، عوامی سہولیات کی فراہمی اور انفراسٹرکچر کی بہتری کے لیے 15 کروڑ روپے کے التوا میں پڑے کاموں کو فوری منظوری دے کر شروع کرنے کا پرزور مطالبہ بھی پیش کیا۔ ٹی پی سی سی صدر اور انچارج منتری نے اس نمائندگی کی ستائش کرتے ہوئے مکمل یقین دہانی کرائی کہ لاء اینڈ آرڈر کو پوری مضبوطی سے برقرار رکھا جائے گا، عوام کے تحفظات کو دور کیا جائے گا اور 15 کروڑ روپے کے ترقیاتی کاموں کو بھی جلد از جلد منظوری دی جائے گی۔ اس نمائندہ وفد میں کپلو کونسلر توحید الدین (رفو)، کونسلر زکی الدین، نمائندہ کونسلر شیخ سلمان، نمائندہ کونسلر شیخ فیروز، نمائندہ کونسلر شیخ شکیل، نمائندہ کونسلر محمد رفیع، نمائندہ کونسلر ذاکر اور کوآپشن ممبر اسلم خان شامل تھے، اور تمام اراکین نے ایک آواز ہو کر شہر کے امن، قانون کی پاسداری اور ہمہ جہت ترقی کے عزم کا اعادہ کیا۔