سیمیکنڈکٹر ڈیزائننگ کے شعبے میں طلبہ کے لیے بہترین مستقبل اور ترقی کے نئے مواقع: باسرہ IIIT میں خصوصی ورکشاپ کا کلکٹر نرمل بھاویش مشرا کے ہاتھوں شاندار افتتاح
byAWAZ E NIRMAL NEWS•
0
آوازِ نرمل نیوز رپورٹ / نرمل - 18 اگست: ضلع کلکٹر نرمل بھاویش مشرا نے طلبہ پر زور دیا ہے کہ وہ عصر حاضر کے تقاضوں کے عین مطابق جدید ترین تکنیکی مہارتوں کو پروان چڑھائیں اور فراہم کردہ بہترین مواقع سے بھرپور فائدہ اٹھا کر اپنے روشن مستقبل کی راہ ہموار کریں۔ منگل کے روز باسرہ آئی آئی آئی ٹی (IIIT Basar) کے میٹنگ ہال میں 'نیشنل انسٹی ٹیوٹ آف الیکٹرانکس اینڈ انفارمیشن ٹیکنالوجی' (NIELIT) حیدرآباد کے اشتراک سے سیمیکنڈکٹر ڈیزائننگ پر منعقدہ ۵ روزہ خصوصی ورکشاپ کا روایتی شمع روشن کرکے افتتاح کرنے کے بعد اپنے جامع خطاب میں انہوں نے کہا کہ موجودہ ڈیجیٹل دور میں سیمیکنڈکٹر کی تیاری اور ڈیزائننگ کی مانگ میں عالمی سطح پر غیر معمولی اضافہ ہوا ہے، جس کے پیشِ نظر آئی آئی آئی ٹی کے طلبہ کے لیے اس نوعیت کی اعلیٰ اور معیاری تربیت کا نظم ایک انتہائی ستائش کے قابل قدم ہے۔ انہوں نے طلبہ کو ہدایت دی کہ وہ اپنے بنیادی نصابی مضامین پر کامل عبور حاصل کریں، محض نظریاتی تعلیم تک محدود رہنے کے بجائے عملی علم (Practical Knowledge) میں اضافہ کریں اور اساتذہ کی رہنمائی میں ہر موضوع کا گہرائی سے تجزیہ کرتے ہوئے سائنس و ٹیکنالوجی کے میدان میں نئی بلندیوں کو چھوئیں۔ انہوں نے واضح کیا کہ تعلیمی مراحل کی تکمیل سے قبل ہی طلبہ کو باوقار ملازمتوں اور روزگار کے بہترین مواقع کی فراہمی کو یقینی بنانے کے لیے تمام تر ضروری وسائل دستیاب کروائے جا رہے ہیں۔ اس موقع پر بھینسا کے سب کلکٹر اجمیرا سنکیت کمار، ورسٹی کے وائس چانسلر پروفیسر گووردھن، NIELIT حیدرآباد کے انچارج ڈائریکٹر ڈاکٹر لکشمن کوررا، OSD مرلی درشن، آئی ڈیکس کے سابق ڈائریکٹر کرنل (رٹائرڈ) اے کے سنگھ، ویرا ٹیکٹیکل ڈائنامکس کے سی ای او سائی تیجا، کیوکلیئر وائنس کوانٹم لیبس کے نائب صدر (سیلز) سرینیواس، شعبہ جاتی اساتذہ، حکام اور طلبہ کی بڑی تعداد موجود تھی۔
