11ویں بیچ کے صد فیصد نتائج پر جشنِ کامیابی؛ عثمان بن عقیل و دیگر معززین کے ہاتھوں ہونہاروں کی حوصلہ افزائی
رپورٹ: آوازِ نرمل نیوز (10 مئی 2026) تعمیرِ ملت اور فکری بالیدگی کے سفر میں تعلیمی اداروں کا کردار کلیدی اہمیت کا حامل ہے اور اسی تسلسل کو برقرار رکھتے ہوئے شہر کے معتبر تعلیمی مرکز بلیو اسٹار ہائی اسکول گجول پیٹ نے ایس ایس سی نتائج میں اپنی روایتی برتری برقرار رکھتے ہوئے صد فیصد کامیابی کا اعزاز حاصل کیا ہے جس کی مناسبت سے اسکول کی گیارہویں بیچ کے ہونہار طلباء کے اعترافِ خدمات کے لیے ایک پُر وقار و یادگار تقریبِ اعزاز کا انعقاد عمل میں لایا گیا جس میں اسکول کے بانی و پرنسپل جناب سید مجیب قادری اور نائب پرنسپل محترمہ شاہدہ سمرین قادری کی دعوت پر شہر کی ممتاز صحافتی و سماجی شخصیت جناب عثمان بن عقیل نے بطور مہمانِ خصوصی شرکت کی جبکہ دیگر معزز مہمانانِ گرامی میں جناب اعجاز احمد خان، جناب عبد المالک، جناب شیخ مجیب، جناب عبدالعزیز اور جناب عدنان بن عقیل نے جلوہ افروز ہو کر محفل کی رونق کو دوبالا کیا اور اس پر اثر تقریب کے دوران مہمانِ خصوصی نے اپنے بلیغ خطاب میں اس حقیقت کو اجاگر کیا کہ تعلیم ہی وہ واحد زیور ہے جو انسان کے جوہر کو نکھارتا ہے اور بچوں کی یہ شاندار کامیابی دراصل اساتذہ کی جگر سوزی اور والدین کی مخلصانہ دعاؤں کا ثمر ہے جس پر یہ ادارہ اور پورا شہر مبارکباد کا مستحق ہے جبکہ اسکول انتظامیہ کی جانب سے تمام مہمانوں کی شایانِ شان شال پوشی کرتے ہوئے انہیں یادگاری تحائف پیش کیے گئے جس کے بعد مہمانوں کے مبارک ہاتھوں سے ان شاہین صفت طلباء کو میڈلز، ایوارڈز اور اسنادِ حسنِ کارکردگی سے نوازا گیا جو مستقبل میں ملک و قوم کا نام روشن کرنے کا عزم رکھتے ہیں اور اس موقع پر والدین نے پرنسپل سید مجیب قادری کی تعلیمی بصیرت اور اساتذہ کی بے لوث خدمات کی ستائش کرتے ہوئے بے پناہ مسرت کا اظہار کیا اور آخر میں یہ تقریب تمام شرکاء کے دلوں میں کامیابی کی نئی امنگیں بیدار کرتی ہوئی اپنے اختتام کو پہنچی۔
