صوفی نگر نرمل میں حضرت صوفی حسین علی شاہ قادری شطاری سرمدی سرمست قلندریؒ کے 99 ویں عرسِ شریف کی تیاریاں عروج پر، 2 جون سے سہ روزہ تقاریب کا شاندار آغاز

 

نرمل (رپورٹ: آوازِ نرمل نیوز - 29 مئی 2026): صوفی نگر نرمل کے افق پر تقدس مآب اور بطلِ جلیل حضرت صوفی حسین علی شاہ قادری شطاری سرمدی سرمست قلندری رحمۃ اللہ علیہ کا 99 واں سالانہ عرسِ شریف روایتی شایانِ شان، تزک و احتشام اور زبردست عقیدت و احترام کے ساتھ مورخہ 2 تا 4 جون 2026ء مطابق 15 تا 17 ذی الحجہ 1447 ہجری منعقد ہونے جا رہا ہے جس کے لیے درگاہ شریف کے احاطے میں تیاریاں اپنے شباب پر ہیں اور اس سہ روزہ فیوض و برکات سے معمور روحانی اجتماع کی تمام تر مذہبی تقاریب و رسومات سجادہ نشین درگاہ شریف صوفی نگر، قبلۂ محترم حضرت صوفی شاہ محمد ذاکر حسین المعروف ذیشان پاشا المعروف نواز علی شاہ قادری شطاری کی فیض اثر نگرانی، جلیل القدر سرپرستی اور صدارتِ عالیہ میں روایتی حسنِ عقیدت کے ساتھ انجام پائیں گی جبکہ صوفی چیریٹیبل اینڈ ریلیجیس ٹرسٹ کی جانب سے جاری کردہ مستند اعلامیے کے بموجب عرسِ مبارک کے ان ایامِ سعید میں زائرین کی روحانی تشنگی کو بجھانے کے لیے جلوسِ نشانِ مبارک، غسلِ شریف، چراغاں، جلسۂ عظمتِ مصطفیٰ ﷺ و عشقِ رسول ﷺ، پرکیف محفلِ قوالی، حلقۂ طریقت، بدوا، فاتحہ خوانی، زیارتِ تبرکات اور وسیع پیمانے پر لنگرِ عام جیسے روح پرور پروگراموں کا باضابطہ اہتمام کیا گیا ہے اور اس تاریخ ساز عرسِ پاک میں شرکت کی غرض سے نہ صرف تلنگانہ بلکہ پڑوسی ریاستوں مہاراشٹرا، آندھرا پردیش اور ملک کے گوشے گوشے سے ہزاروں کی تعداد میں مریدین، سچے عقیدت مندوں، جید علماء کرام، مشائخِ عظام اور جلیل القدر سماجی و سیاسی شخصیات کی آمد متوقع ہے جس کے پیشِ نظر درگاہ انتظامیہ کی جانب سے زائرین کی سہولت اور امن و نظم کو برقرار رکھنے کے لیے ہر سطح پر انتظامات کو حتمی شکل دی جا رہی ہے تاکہ تمام محبانِ صوفی، وابستگانِ طریقت اور عامۃ المسلمین عرسِ شریف کی ان نورانی و پروقار تقاریب میں شریک ہو کر فیوض و برکات اور دارین کی لازوال سعادتوں سے مستفیض ہو سکیں۔