ضلع نرمل کے نئے کلیکٹر کی حیثیت سے شری بھاویش مشرا (IAS) کا تقرر، ابھیلاشا ابھینو کا تبادلہ

 رپورٹ: آوازِ نرمل نیوز، 25 اپریل 2026: خلوصِ دل سے کرتے ہیں ہم خیر مقدم آپ کا، ترقی کی نئی منزل کا اب آغاز ہوتا ہے—حکومتی احکامات کی روشنی میں انتظامی افق پر ایک نمایاں تبدیلی رونما ہوئی ہے جس کے تحت شری بھاویش مشرا (IAS) کو ضلع نرمل کا نیا کلیکٹر متعین کیا گیا ہے، جبکہ سابقہ کلیکٹر ابھیلاشا ابھینو کا یہاں سے تبادلہ عمل میں لایا گیا ہے۔ اپنی بے داغ شہرت، انتظامی بصیرت اور عوامی خدمت کے جذبے سے سرشار مسٹر مشرا کی اس کلیدی عہدے پر آمد ضلع کی ہمہ جہت ترقی کے لیے ایک نویدِ سحر ثابت ہوگی۔ اہلِمحلّہ اور سماجی حلقوں میں اس تقرری کو قدر کی نگاہ سے دیکھا جا رہا ہے اور یہ قوی امید کی جا رہی ہے کہ ان کے دورِ قیادت میں تعمیر و ترقی کے بند کواڑ کھلیں گے اور ضلعی انتظامیہ عوامی مسائل کے ازالے کے لیے نئی تندہی سے سرگرمِ عمل ہوگی؛ خرد مندوں کی آمد سے ہی بنتے ہیں مقدر اب، آپ کی صورت میں نرمل کو نیا رہبر ملا ہے۔ آوازِ نرمل نیوز نئے کلیکٹر صاحب کی آمد کا پُرتپاک استقبال کرتے ہوئے اس توقع کا اظہار کرتا ہے کہ ان کی ولولہ انگیز قیادت میں ضلع نرمل مثالی کامیابیوں اور خوشحالی کی نئی بلندیوں کو چھوئے گا۔