رائیتو بھروسہ کی برسات: وزیر اعلیٰ ریونت ریڈی نے 40 لاکھ کسانوں کے کھاتوں میں جاری کیے اربوں روپے

رپورٹ: آوازِ نرمل نیوز، 20 اپریل 2026— تلنگانہ کے وزیر اعلیٰ جناب اے. ریونت ریڈی نے کسان دوستی کا حق ادا کرتے ہوئے ضلع جے شنکر بھوپال پلی کے موضع نستور پلی میں منعقدہ 'رائیتو اتسو' کے پروقار موقع پر ایک کلک کے ذریعے ریاست کے 40 لاکھ کسانوں کے کھاتوں میں 'رائیتو بھروسہ' کی رقم منتقل کر دی ہے، جس کے تحت آج مجموعی طور پر 2,200 کروڑ روپے جاری کیے گئے جبکہ وزیر اعلیٰ نے کسانوں کے جمِ غفیر سے خطاب کرتے ہوئے اعلان کیا کہ اب تک اس اسکیم کے تحت 5,700 کروڑ روپے کسانوں کی جھولی میں ڈالے جا چکے ہیں اور اگلے ماہ مزید 3,300 کروڑ روپے کی فراہمی کو یقینی بنایا جائے گا۔ وزیر اعلیٰ، جنہوں نے تقریب سے قبل کسانوں کے ساتھ ایک پرجوش ریلی میں شرکت کر کے ان کا حوصلہ بڑھایا، اپنے خطاب میں کسان کو ملک کی ریڑھ کی ہڈی قرار دیتے ہوئے کہا کہ زراعت کو 'دنڈگا' (خسارہ) نہیں بلکہ 'پنڈگا' (جشن) بنانا ان کا نصب العین ہے، اسی لیے حکومت نے اپنے وعدے کے مطابق ایک سال کے مختصر عرصے میں 25.35 لاکھ کسانوں کا 2 لاکھ روپے تک کا قرض معاف کر کے ایک نئی تاریخ رقم کی ہے۔ اس عظیم الشان جلسے میں ریاستی وزراء جناب تھملہ ناگیشور راؤ، ڈی. سریدھر بابو، اتم کمار ریڈی، پونم پربھاکر، پونگولیٹی سرینواس ریڈی اور سیتاکا سمیت دیگر اہم عوامی نمائندوں نے شرکت کی، جہاں وزیر اعلیٰ نے اس عزم کا اعادہ کیا کہ کسانوں کی آنکھوں میں خوشی دیکھنا ہی ان کی سیاست کا اصل حاصل ہے اور حکومت آبپاشی کے ادھورے منصوبوں کو جنگی بنیادوں پر مکمل کر کے ہر کسان کے کھیت کو سیراب کرنے کے لیے جی جان سے کوشاں ہے۔