نرمل کے 'مردِ مجاہد' گنگی شٹی پروین کمار کی بے مثال قربانی: 101 ویں مرتبہ خون دے کر موت کے منہ سے زندگی چھین لائے!

 نرمل (تحریر عثمان بن عقیل  آوازِ نرمل): ارادے جن کے پختہ ہوں اور جن کے دلوں میں خدمتِ خلق کا سمندر موجزن ہو، ان کے لیے عمر کے ہندسے اور سماجی رتبے کوئی معنی نہیں رکھتے؛ اس عظیم حقیقت کی زندہ جاوید مثال وارڈ نمبر 15 کے کونسلر جادو سورج نائک کی ہمشیرہ کے لیے پیش کی گئی، جب 60 سالہ گنگی شٹی پروین کمار (جو ایک چھوٹی سی کیرانہ دکان چلا کر رزقِ حلال کماتے ہیں) نے اپنی زندگی کا 101 ویں مرتبہ خون کا عطیہ دے کر انسانیت کی بقا کی ایک نئی تاریخ رقم کر دی۔ تفصیلات کے مطابق، ادرش نگر سے تعلق رکھنے والی بی جے پی کونسلر کی ہمشیرہ کو وضع حمل (ڈلیوری) کے دوران شدید طبی ایمرجنسی میں خون کی اشد ضرورت پیش آئی، جس پر معروف سوشل ورکر اظہر خان نے فوری طور پر پروین کمار صاحب سے رابطہ کیا۔ انسانی ہمدردی کا یہ بے مثال نمونہ دیکھنے کو ملا کہ رات کے ایک بجے کی خاموشی میں، محض ایک فون کال پر "لبیک" کہتے ہوئے، پروین کمار صاحب نے اپنے آرام کو تج دیا اور ہسپتال پہنچ کر اپنی رگوں کا لہو ایک بہن کی زندگی بچانے کے لیے وقف کر دیا۔ اس جذباتی اور پروقار موقع پر آوازِ نرمل نیوز چینل کے نمائندے عثمان بن عقیل نے جائے وقوع پر موجود رہ کر اس پورے منظر کو اپنے کیمرے کی آنکھ میں محفوظ کیا اور پروین کمار صاحب سے تفصیلی گفتگو پر مبنی ایک خصوصی ویڈیو رپورٹ بھی تیار کی، جس میں 101 مرتبہ خون دینے کے اس حیرت انگیز سفر اور ان کے جذبہِ ایثار کو اجاگر کیا گیا۔ ایک چھوٹے تاجر ہونے کے باوجود بڑے دل کے مالک پروین کمار کا یہ عمل پورے ضلع نرمل کے لیے فخر کا باعث ہے، جو یہ پیغام دیتا ہے کہ بے لوث خدمت ہی اصل بندگی ہے۔